#
कण अजीब बात च ?
नापी की,अफ्फु ते पूरु,
जब भी एक चदरू खरीदी की लोंदु छौं,
हर दफा अफरा खुटु ते,
एक बिलिस्त भेर ही पांदु छौं।
#
पाई पाई ते तरसी की,
जब भी, कै खजणू ते पांदु छौं।
बस एक पाई कखिन और मिल जांदी,
ये ही जुगाड़ मा लग्युं रेंदु छौं।
#
अग्णे भगणे की दौड़ मा,
सब्युं ते पिछणे छोड़दु जांदू छौं,
यन त दगड्या भिजां छन यख,
पर दगडू कम कू ही यख पांदु छौं।
#
सेरा सुख खरीद ल्यूं सोच्दु छौं,
पर हर दफा अपरू खीसु फट्यूं पांदु छौं,
सांस, त यन रोज ही लेन्दू छौं पर,
कुजणी, जीणू ते किले तरस जान्दुं छौं?
#
कण अजीब बात च ?
नापी की,अफ्फु ते पूरु,
जब भी एक चदरू खरीदी की लोंदु छौं,
हर दफा अफरा खुटु ते,
एक बिलिस्त भेर ही पांदु छौं।
कोई टिप्पणी नहीं:
एक टिप्पणी भेजें